A CIG obtén a maioría da representación do persoal de Bioetanol Galicia

A central nacionalista logrou catro delegados e consolida a súa presenza nas instalacións da empresa en Teixeiro

A CIG conseguiu a maioría absoluta nas eleccións celebradas o xoves 15 de decembro na empresa Bioetanol Galicia, S.A., situada en Teixeiro (Curtis), ao acadar catro dos/as cinco representantes que conformarán o Comité de empresa. A central nacionalista consolida deste xeito a súa presenza neste centro de traballo, xa que a lista independente só acadou unha delegada no colexio de técnicos e administrativos, mentres que nin CCOO nin UGT lograron montar candidatura.

Dende a Federación de Químicas e Enerxía da comarca da Coruña quixeron agradecer “o bo facer e o duro traballo levado a cabo polos compañeiros da Sección Sindical da CIG nesta empresa” nos últimos anos.

Con estes resultados, sinalan, queda consolidada a posición do sindicalismo nacionalista en Bioetanol Galicia, tendo en conta, ademais, que CCOO e UGT, que concorrían habitualmente ao proceso, desta volta non foron capaces de montar candidatura a pesares de intentalo.

Os resultados das votacións son os que seguen:

	CIG		Independentes
	Votos	Delegados	Votos	Delegados
Colexio Técnicos Administrativos	17	1	12	1
Colexio Especialistas e Non Cualificados	39	3	6	0
Total votos	56 (75,67%)		18 (24,32%