Acádase o I Convenio galego para traballadores e traballadoras de Arqueoloxía

Dende a Federación da Banca da CIG informouse ao colectivo dos traballadores/as que tras a remisión do borrador á AEGA, unha vez votado e aprobado na Asemblea Xeral, foi necesaria a realización dalgunha xuntanza cos representantes de dita asociación, co fin de aclarar certos aspectos do convenio. Eses aspectos formalízanse nalgúns cambios que aparecen no texto definitivo do convenio, entre os que xa se inclúe o aumento na táboa salarial do IPC correspondente ao ano 2009 (1,4% de IPC+0,5%).

O documento aprobado estabelece catro categorías profesionais: arqueólogo/a, técnico/a especialista, persoal de apoio e persoal administrativo e recolle que, en calquera actividade arqueolóxica, o persoal das categorías I e II debe representar, cando menos, o 25% do persoal dedicado a esa actividade.

Así mesmo, recóllense as táboas salariais para este ano en cada unha das categorías, regúlase a contratación dos profesionais e exclúense da aplicación dalgúns puntos do convenio a aqueles profesionais que gocen de mellores condicións que as recollidas no documento, xa que as condicións están estabelecidas “con carácter de mínimas”, co obxectivo de achegar un primeiro marco regulador neste sector dentro do ámbito galego.

Tamén se dedica un punto do convenio para a contratación de persoal autónomo, no que se determina que “as empresas non poderán contratar con estes/as a prestación de servizos independentes por debaixo dos custos laborais que se derivarían da contratación dun traballador/a por conta allea da mesma categoría e nas mesmas condicións laborais”. Con este acordo preténdese evitar a utilización xeneralizada ou abusiva de profesionais autónomos para eludir as obrigas pactadas neste convenio.

Novas relacionadas