Peche de 24 horas no Hospital Xeral de Vigo contra a privatización da sanidade pública

Ás 11 da mañá deste martes 16 de marzo daba comezo o peche na entrada do hospital Xeral de Vigo en protesta pola privatización da sanidade pública que o goberno galego pretende realizar. A medida de protesta, segundo informaron dende a CIG-Saúde, está sendo todo un éxito de participación e implicación do persoal.

Continuando co calendario de mobilizacións en contra do proceso de privatización da sanidade que o goberno galego vén de iniciar, traballadores e traballadoras da sanidade iniciaban na mañá deste martes o peche de 24 horas convocado no Hospital Xeral de Vigo. Con esta nova protesta, que está sendo un éxito de participación e conta coa implicación de todo o persoal, quérese amosar o rexeitamento á privatización da sanidade e visibilizar a loita pola defensa dunha sistema sanitario público e de cualidade.

Dende a CIG-Saúde de Vigo lembran a todas as persoas que queiran participar na distribución de anuncios de cara a manifestación do vindeiro 25 de marzo, poden xa pasar a recoller o material.

O peche permanecerá activo na entrada do Hospital Xeral de Vigo até ás once da mañá do mércores 17 de marzo. A próxima mobilización prevista contra a privatización da sanidade terá lugar o 22 de marzo e consistirá nunha concentración diante do Concello de Vigo, a partir das 10:30 horas.