A CIG saúda a proposta do BNG aos seus ex altos cargos para que renuncien ao plus, pero exixe a derrogación desta medida

Lembra que a ILP promovida pola central contra o complemento de destino estivo bloqueada no Parlamento

A CIG recibiu con satisfacción a noticia de que o BNG vai instar aos seus militantes que ocuparon postos de dirección política na pasada lexislatura e teñen dereito a cobrar o plus de até 15.000 euros a renunciar a dito complemento. Non obstante, dende a central considérase que esta recomendación non deixa de ser “un parche” que non soluciona o problema de fondo, xa que deixa en mans da decisión individual a renuncia ao complemento.

O secretario xeral da CIG, Suso Seixo, acompañado polo secretario nacional de CIG-Ensino, Anxo Louzao e polo letrado da CIG, Héctor Ruíz, fan entrega das máis de 19.000 sinaturas no rexistro da Xunta Electoral de Galiza, no segundo andar do edificio do Parlamento de Galiza.

“Felicitamos a decisión do BNG de recomendar aos seus militantes con dereito ao plus de altos cargos que renuncien ao complemento de destino”, sinalou o secretario xeral da CIG, Xesús Seixo, “parécenos positivo, pero non deixa de ser un parche que non soluciona o problema de fondo, pois deixa na decisión individual a renuncia ao plus”.

Para Seixo o importante é suprimir a disposición adicional 17ª da lei da función pública, que permite que os funcionarios que ocuparon postos de dirección poidan cobrar un plus de até 15.000 euros, e solicitou ao BNG que continúe adiante coa Iniciativa Lexislativa Popular presentada pola CIG ou ben que como grupo “promova unha proposta para modificar a lei no senso de eliminar o complemento. Iso sería o que tería realmente transcendencia de cara ao futuro”.

O secretario xeral da CIG quixo lembrar que central nacionalista foi a única que no seu momento “deu a cara en contra do plus dos altos cargos, manifestando publicamente e de forma activa a nosa oposición a esta medida”. Seixo reiterou a petición de retirar o complemento de destino por tratarse dunha medida inxusta e discriminatoria e recordou que a ILP “está aí” e que os grupos a poden retomar “se interesa”.

En xuño de 2008 a CIG entregou no Parlamento de Galiza máis de 19.000 sinaturas, para promover unha ILP e obrigar á institución parlamentaria a retomar o debate sobre o chamado plus de altos cargos. Non obstante, o debate da proposta de lei sufriu un bloqueo permanente na pasada lexislatura tanto por parte dos grupos políticos como da presidencia do Parlamento.

Máis información