A CIG-Ensino exixe que non se apliquen as medidas anunciadas polo Ministro de Educación

Denuncia que supoñen o ataque máis grave ao ensino público desde o franquismo e unha invasión das competencias que lle corresponden a Galiza

Ante as medidas anunciadas polo Ministro de Educación aos conselleiros das Administracións educativas dos distintos territorios do Estado, a CIG-Ensino adianta que non consentirá que se apliquen en Galiza. Nunha primeira valoración, que será ampliada na rolda de prensa que a federación ten prevista para este martes, o secretario nacional, Anxo Louzao, avanza que se exixirá do Conselleiro de Educación “que se rexeiten as medidas que a Administración central prevé aplicar, xa que supoñen o ataque máis grave ao Ensino público desde o franquismo e botar ao paro miles de interinos/as”.

Louzao lembra que “o Conselleiro de Educación foi pioneiro nos recortes no ensino público, mediante a ampliación do horario lectivo do profesorado, o incremento de días de baixa do profesorado sen ser cuberto mediante substitución e outras medidas que levaron a que os centros galegos estean sufrindo hoxe carencias de profesorado e de medios. Non perdamos de vista que nestes últimos anos suprimíronse máis de 2.000 docentes e que con estas medidas veríanse incrementados noutros tantos. ”

Entende que estas medidas “son un ataque aos alicerces da calidade de ensino” e que atacan algúns dos elementos esenciais para acadar unha educación de calidade. Entre outros, CIG-Ensino sinala:

Ø Un número reducido de alumnos e alumnas por aula, que faga posíbel unha educación máis personalizada

Ø Un número de profesorado por centro suficiente para atender as distintas necesidades e a diversidade escolar

Ø Unha maior diversidade na oferta formativa para o alumnado, de tal xeito que estean cubertas as súas necesidades formativas.

O secretario nacional de CIG-Ensino, pregúntase como se pode falar de calidade do ensino nunha aula na que se poderán superar os 36 alumnos/as, cada un con distintas motivacións e diferentes ritmos de aprendizaxe. Aulas en que haberá alumnos que precisen unha atención personaliza, por provir do estranxeiro ou por ter necesidades educativas específicas e como se pode procurar a atención de todas e todos, promover a participación de cada alumna e alumno e procurar un desenvolvemento práctico da materia máis alá da charla maxistral do profesor ou profesora.

Xunto a isto, denuncia que estas medidas supoñen unha invasión absoluta das competencias que a Galiza lle corresponden, un feito que nos retrotrae ao estado preautonómico.