Traballadores/as do naval cortan o tráfico en Vigo para reclamar unha alternativa ao tax lease que xenere carga de traballo

Un grupo duns 200 traballadores/as do sector naval da Ría de Vigo realizaron un corte de tráfico fronte ao estaleiro Barreras, na Avenida de Beiramar, para esixir unha alternativa ao sistema de bonificación fiscal tax lease que permita ás empresas firmar novos proxectos. Dende a CIG denuncian que a falta de vontade política do Goberno español e da Xunta de Galiza está a condenar a morte a unha industria fundamental para a comarca viguesa e estratéxica para o conxunto do país.

Os traballadores/as e delegados/as do naval interromperon a circulación por espazo de dúas horas na Avenida de Beiramar para protestar pola falta de solucións á grave crise que atravesa o sector. Continúan deste xeito as mobilizacións que con anterioridade os levou a ocupar o Concello de Vigo e a facerse escoitar nos mitins que os candidatos á Presidencia do Goberno español de PP e PSOE organizaron na cidade.

Dende a CIG criticaron que a falta de vontade política das Administracións española e galega está a agravar aínda máis a delicada situación que vive a industria despois da suspensión do sistema de bonificación fiscal coñecido como tax lease. Diante disto, reclaman unha aposta clara por un sector fundamental para Vigo e estratéxico para o conxunto do país.