O sábado 20 de febreiro o Comité de Levantina convoca unha concentración na Praza do Concello de O Porriño

O xoves 18 de febreiro ás 14 da tarde tiña lugar ás portas da factoría de Levantina, no Polígono da Granxa, unha nova concentración de perto de cen traballadores/as, que no cambio de quenda, se volveron mobilizar para amosar o seu rexeitamento aos traslados forzosos, que son novos despedimentos encubertos. O sábado dia 20 ás 12 fronte ao Concello do Porriño hai convocada unha concentración convocada polo Comité de Empresa de Levantina, no que teñen presenza CIG, CCOO e UGT.

Son sete traslados forzosos a Alacant: deste sete, 3 son membros do Comité de Empresa e duas traballadoras están acollidas a redución de xornada por coidado de fillos, polo que con esta nova concentración volvían denunciar a "falta de respecto aos traballadores/as".

Desde a CIG-Construción consideran estes feitos como un "un exemplo de como entende a patronal o respeito polos dereitos á representación sindical e a obriga legal de facilitar a conciliación da vida laboral e familiar".

Concentración o sábado 20

Os traballadores e traballadoras de Levantina convocaron unha nova concentración, que desta volta será o sábado 20 ás 12 fronte ao Concello de O Porriño.

O motivo desta concentración, como das anteriores mobilizacións, é a de amosar o rexeitamento ás medidas adoptadas pola empresa, obrigando ao traslado de compañeiras e compañeiros, "o que na prática ven significar o despedimento e o inicio do desmantelamento de instalacións en O Porriño coa conseguinte perda de postos de traballo".

Realizan un chamamento á solidariedade e á participación nesta nova mobilización "para demostrarlle á Patronal que estas actuacións unilaterais e de desprezo ás condicións de vida da clase traballadora van ser respostadas sempre".

Ese mesmo sábado está solicitada unha entrevista co alcalde do Porriño, despois desta mobilización.