A CIG gaña unha sentenza que lle outorga a un traballador no porto de Ferrol coeficientes do mar

Logo dun longo proceso xudicial iniciado entre os anos 2003 e 2004, a CIG vén de acadar unha sentenza favorábel e firme (contra a que non cabe recurso), pola que un traballador do Porto de Ferrol pasa ao Réxime Especial de Traballadores do Mar, considerando que realiza labores de estiba e desestiba.

Segundo informan dende a sección sindical da CIG en Endesa, este traballo ten asignado un coeficiente redutor de 0.30, ou dito doutro xeito, cada dez anos traballados anticipan a xubilación en tres anos.

“Consideramos que esta é unha boa nova para o conxunto dos/as traballadores/as deste servizo, e que bota luz sobre a polémica xerada no seu día cando da CIG decidiu xerar este proceso”, apúntase nun comunicado da sección sindical.