BBVA nos xulgados pola situación de OP+

Dende 2007 a Sección Sindical de CIG en BBVA vén denunciando a ilegalidade e as consecuencias que os Proxectos Velázquez e Clima traían ao panorama laboral. Ditos proxectos supoñen unha reconversión precursora na banca tal e como a coñecemos, co obxectivo de transformar a rede nun conxunto de puntos de venda, reducindo postos de traballo e externalizando todo o traballo administrativo en distintas etapas a outras empresas, maiormente OP+, tanto no Estado español como noutros países.

OP+ é unha empresa creada por BBVA, presente en varios países, cuxa sede no territorio español atópase nunha nave industrial en Málaga.

OP+ traballa en exclusiva para o grupo BBVA realizando labores administrativas de banca, para o que primeiro reduce persoal de banca en BBVA mediante prexubilacións ou baixas incentivadas e logo contrata persoal máis barato.

Perda de postos de traballo

Polo de agora perdéronse 3.000 postos de traballo no Estado e 200 en Galiza, e se calcula que se poderían perder ata 8.000, 400 deles na Galiza.

No caso de OP+ Málaga, o persoal alí contratado se rexe polo Convenio de Oficinas e Despachos da provincia, cunhas condicións moito peores que as do persoal de BBVA.

Adhesión á demanda da CGT

A Sección Sindical da CIG en BBVA adheriuse á demanda presentada por CGT reivindicando o dereito dos traballadores e traballadoras de OP+ a formar parte do cadro de persoal de BBVA ou subsidiariamente, que lles sexa de aplicación o Convenio de Banca.

No xuízo, celebrado o pasado día 15 de marzo, tanto a CIG como a CGT aportaron proba documental e testifical na que se pode apreciar como OP+ funciona como empresa interposta de BBVA co único fin de aforrar custes laborais.

As probas documentais aportadas foron apoiadas por testemuñas como a do delegado sindical e traballador do BBVA, Luciano Luxilde.

En espera de Sentenza

Co silencio cómplice das Seccións Sindicais de CCOO e UGT en BBVA como telón de fondo (xa que estando citadas non compareceron), o xuízo quedou visto para Sentenza.

Independentemente de cal sexa o resultado do xuízo, a Sección Sindical de CIG vai seguir loitando contra a destrución de postos de traballo en BBVA e contra a contratación de persoas en condicións de precariedade laboral mediante empresas interpostas ou calquera outro truco que se lles ocorra, sexa nos Xulgados, na rúa ou onde sexa preciso.