A CIG-Construción de Ferrol reclama ao Concello que vixíe as condicións laborais dos traballadores/as das obras do Plan E

A Federación de Construción e Madeira da CIG-Ferrol levou a cabo no mediodía do venres 18 de setembro unha concentración ás portas do Concello de Ferrol para denunciar, unha vez máis, as precarias condicións de traballo nas que se atopan os traballadores da maioría das empresas que desenvolven a súa actividade nas obras adscritas ao Plan E.

Así mesmo, a CIG-Construción fixo entrega dun escrito no Rexistro municipal dirixido ao Alcalde de Ferrol, no que se instaba ao Concello a facer un seguimento tanto do desenvolvemento das obras como do réxime de contratacións e despedimentos ao que están sometidos estes traballadores/as, de  cara a adoptar medidas sancionadoras coas empresas que vulneren a lexislación laboral.

Dende a Federación de Construción e Madeira da CIG-Ferrol sinalaron que van continuar “vixiando exhaustivamente a estas empresas e emprenderemos as accións que consideremos oportunas con aquelas que atenten contra os dereitos dos traballadores/as”, sinala o responsábel comarcal da Federación, Marcos Sánchez.

Denuncias de traballadores/as

Dende que comezaron as obras adscritas ao Plan E moitos traballadores e traballadoras acudiron á CIG para denunciar as constantes infraccións nas que estaban a incorrer as diferentes empresas que executaban estes traballos.

As denuncias facían referencia tanto á vulneración dos seus dereitos fundamentais como á falta de profesionalidade e responsabilidade coa que estas empresas acometían as obras, moito máis preocupadas por obter beneficios a curto prazo que en facer os traballos coa calidade que se lles esixe.