As traballadoras de Confecciones Lema inician unha campaña para reclamar o cobro dos salarios e indemnizacións

As traballadoras de Confecciones Lema iniciaron unha compaña para denunciar publicamente a súa situación laboral, logo de que a empresa pechase as portas sen facerse cargo dos salarios nin das indemnizacións correspondentes. As traballadoras estiveron repartindo panfletos nos que expoñen a súa situación o domingo 18 de xaneiro na feira de Lestedo (Boqueixón).

As traballadoras de Confecciones Lema contaron co apio dos compañeiros da Federación de Servizos da CIG de Compostela, así como dun grupo de afiliados/as para repartir os folletos entre as persoas que asistiron á feira de Lestedo, nos que se da conta da súa actual situación laboral. Escolleron este lugar por tratarse dunha zona céntrica de dous concellos e con gran afluencia de veciños, xa que a empresa estaba inicialmente en San Miguel de Sarandón (Vedra) e posteriormente foi trasladada a Lestedo (Boqueixón).

Este grupo de traballadoras levaban 20 anos desenvolvendo a súa actividade para esta empresa dedicada á confección de roupa. Non obstante, no pasado mes de maio a propietaria, Pilar Lema, regalou literalmente a empresa a outras dúas empresarias .

No mes de decembro, en concreto o día 19, as novas propietarias comunicáronlle as traballadoras que non había máis carga de traballo, polo que ían solicitar un ERE e non podía facerse cargo nin dos salarios nin das indemnizacións que lles corresponden.

Dende a Federación de Servizos da CIG sinalan que as traballadoras teñen claro que este “regalo” foi unha trampa levada a cabo por Pilar Lema  para desfacerse do persoal "de balde".

A CIG gaña as eleccións sindicais 

A historia do cambio de propietarias comezou o ano pasado cando estas traballadoras, nas eleccións sindicais optaron pola CIG, cansas de cobrar a metade do que se reflectía na súa nómina (450 euros) e na procura de consensuar un calendario laboral. A empresaria, ante esta nova situación, optou por “regalar” a empresa, pero non o patrimonio da mesma.

As traballadoras foron entón trasladadas ao concello veciño de Boqueixón ás novas instalacións. “Desta maneira, Pilar Lema non perdeu absolutamente nada”, indican dende a CIG-Servizos.

Na feira de Lestedo do domingo 18 de xaneiro, estiveron repartindo panfletos tanto nos coches como entre os veciños. Tamén pegaron cartaces por diferentes zonas do Concello así como nos locais e nos postos instalados na feira.

Este é o inicio dunha campaña feita por estas traballadoras para reclamar os seus dereitos laborais e que terá continuidade nos vindeiros días.