Bosch bate os seus propios récords de temporalidade

A taxa de temporalidade é do 89%

Con 1.256 contratos temporais sobre un cadro de persoal total de 1.414 persoas a decembro de 2008, o Centro de chamadas da multinacional Bosch na cidade de Vigo, encabeza o ranking de temporalidade. A Audiencia Nacional deu por boa esta práctica empresarial.Na empresa de telemárketing Bosch, hai 158 persoas con contrato indefinido, 511 teñen un contrato temporal e hai 745 que teñen contratos de posta a disposición (ETT's). O Convenio de Contact Center establece que un 30% do persoal de operacións debe ter contrato indefinido, pero Bosch non computa os contratos de posta a disposición para este cálculo.

Neste senso, a Sección Sindical da CIG presentou un Conflito Colectivo na Audiencia Nacional; esta última desestimou a demanda en Sentenza coñecida este mesmo mes, estando presentado o anuncio de recurso contra a Sentenza ante o Tribunal Supremo.

A Sentenza 136/2008 da Audiencia Nacional, malia desestimar a reclamación da CIG, textualmente di:

"...esta Sala comparte con los demandantes el convencimiento de que la preocupación empresarial por la estabilidad en el empleo del personal de operaciones no se materializa en el modo de calcular el 30% de la plantilla, dada la utilización más que frecuente de contratos de puesta a disposición para ocupar esos puestos".

"En consecuencia sería necesario otro convenio en el que se limitara el recurso a las ETT, como existen en nuestro ordenamiento jurídico, o bien se redactara el art. 14 de modo que se computaran también los puestos ocupados por trabajadores de puesta a disposición...".

Continuará a loita contra a precariedade

A loita contra a temporalidade é básica para a Sección Sindical da CIG en Bosch, maioritaria na empresa cun 70% da representación, que xa anunciou que continuará a súa loita contra a precariedade ao longo deste ano 2009.