CIG-Ensino demada melloras nas condicións profesionais e laborais dos docentes

A CIG-Ensino fixo entrega, no rexistro da Xunta, de 8.125 sinaturas de profesorado na mañá deste mércores 19 de novembro. As sinaturas son resultado dunha campaña que tiña como obxectivo reclamar unha serie de melloras dirixidas a garantir a calidade do ensino e as condicións laborais e profesionais do profesorado.

Entre as demandas presentadas pola CIG-Ensino e apoiadas polos máis de 8.125 profesores e profesoras salientan:

1. Redución das rateos: máximo 15 alumnos/as en Infantil e 20 en Primaria e ESO. Contabilización dos repetidores para formar os grupos; redución das rateos nas aulas que escolarizan alumnado con necesidades educativas especiais.

2.Dotación de administrativos/as en todos os centros de Educación Infantil e de Primaria, ampliación nos outros centros e dotación de coidadores/as onde sexa necesario.

3.Medidas e recursos necesarios para mellorar a calidade do ensino e reducir a conflitividade e o fracaso escolar: maior redución horaria para os/as titores/as, facilitar os desdobres, ampliar e reforzar a orientación escolar, dotar os centros de educadores/as sociais onde sexa necesario, ampliar os cadros de persoal nos centros para garantir a atención personalizada, a atención á diversidade e o reforzo educativo.

4.Dereito indefinido a xubilarse anticipadamente. Mellora da gratificación para acollerse á xubilación anticipada.

5.Redución do horario lectivo aos/ás maiores de 55 anos.

6.Dereito a formarse dentro do horario lectivo.

7.Dereito á revisión anual de saúde para todos e todas os/as docentes.

Para a CIG-Ensino sería totalmente inxustificábel e inaceptábel que se rexeiten as demandas totalmente xustas de máis de 8.000 profesores, non arbitrando as medidas e investimentos necesarios para que durante este curso se negocien e efectivicen estas reivindicacións fundamentais para avanzar na mellora da calidade do ensino. Con ese obxectivo, solicitaron tamén unha entrevista, coa maior brevidade posíbel.