A Nova lei de Montes: cara onde imos?

Este domingo 18 de decembro tivo lugar en Arzúa, dentro do programa da "8ª Feira Ecolóxica 2011" (TERRACTIVA) unha mesa redonda baixo o título "A nova Lei Galega de Montes: Cara onde imos?" na que participaron como organizacións convidadas a Asociación para a Defensa Ecolóxica de Galicia, a Organización Galega de Comunidades de Montes en Man Común, a Federación Rural Galega e a nosa Central Sindical.

En nome da CIG interveu o Secretario Confederal de Medio Ambiente, Anxo Pérez Carballo, que deu conta das alegacións feitas polo sindicato nacionalista ante a Dirección Xeral de Montes e as aportacións presentadas no Consello Económico e Social.

Así mesmo, denunciou os graves prexuízos que podería representar para o noso país, de chegar a aprobarse a Lei nos termos nos que está na actualidade, tanto a nivel ambiental, como social, económico, cultural e patrimonial.

Pérez Carballo animou á sociedade galega a loitar por cambiala nos aspectos máis negativos e por chegar a acadar unha norma vertebradora que poña en valor o monte galego e sexa respectuosa coa nosa riqueza histórica e natural, ao tempo que beneficiosa coa economía produtiva e integrada.