Numerosa concentración de apoio ás traballadoras/es da limpeza do Alcampo e en defensa do cumprimento do convenio

O venres desde as once da mañá de novo perto de trescentos delegados e delegadas do sector Servizos e das tres centrais sindicais - CIG, CCOO e UGT- mobilizábanse fronte ao Alcampo de Coia para amosar o seu rexeitamento aos doce despedimentos de traballadores e traballadoras que levaban até 25 anos realizando labores de limpeza neste centro comercial. Anunciaron que continuarán coas mobilizacións, e que de non mudar a situación actual, variarían o tipo de concentracións e actos levados até o de agora.

Durante máis de dúas horas de novo os chifres, os berros continuos, mesmo potas e culleres batían ben forte fronte a un cordón policial á entrada do Alcampo de Coia. Asi, unha nova mobilización, numerosa e ruidosa, volvia deixar ben claro o rexeitamento total dos traballadores e traballadoras do sector Servizos a estes despedimentos.

Na defensa do convenio

"Que non nos rouben o noso convenio", foi outro dos lemas máis escoitados, en referencia á non subrogación que a fundación Amil Lago, centro especial de emprego, non realizou, e por iso provocaron estes despedimentos.

Presenza policial abusiva

De novo, e aínda que esta era unha mobilización que contaba con autorización gubernamental, un dispositivo desproporcionado de antidisturbios chegou a rodear a mobilización, algo que desde as centrais sindicais cualificaron de "abusivo e antidemocrático".

Máis e distintas accións

Desde as centrais sindicais, anunciaron que continuarán coas mobilizacións, e que se a situación non varia, na próxima semana realizarán novas accións.

Galería de imaxes da xornada