Portada
Temas
Confederal
Sectores
Entrevistas
Opinion
Multimedia
Contacta
 
A Coruña, 19/6/2012
Chuza Menéame del.icio.us
compartir

O persoal de Industrias Caamaño protagonizan unha pequena manifestación polas rúas da Corveira na segunda xornada de folga

Os traballadores continuarán o mércores cos paros de dúas horas en demanda do cobro dos seus salarios
A segunda xornada de paros de dúas horas convocados en Industrias Caamaño volveu rexistrar un seguimento de practicamente o 100% do cadro de persoal, que desta volta protagonizou unha pequena marcha dende a factoría até a Igrexa da Corveira, onde se concentraron durante case unha hora, antes de regresar ás instalacións da Avenida da Cordeda. Os traballadores deron maior visibilidade ao conflito grazas ao son incesante son dos chifres e os petardos.

Os paros de dúas horas (de 08:00 a 10:00 horas) continuarán por terceiro día consecutivo mañá mércores. Para esta xornada, os traballadores teñen previsto facer un reparto de folletos entre os veciños/as da Corveira e unha pegada de cartaces pola Avenida de Vilaboa para informar á cidadanía da situación que están a padecer e esixir unha solución.

Coa convocatoria de folga, que se estenderá até o venres 22 de xuño, os traballadores queren reclamar o cobro dos atrasos salariais (dúas nóminas, a paga extraordinaria de nadal e os atrasos correspondentes aos anos 2010 e 2011) e esixir ao propietario que informe á representación do persoal a respecto das intencións que ten co empresa. Os delegados da CIG en Industrias Caamaño (dedicada á carpintería de aluminio e aceiro) rexeitan o “total pasotismo” do empresario, que continúa negándose a explicar os motivos destes atrasos no cobro das nóminas e non achega ningunha información sobre os contratos ou as contas da compañía.

Desvío de fondos a outras empresas

O persoal sospeita que estas actuacións responden a unha manobra premeditada do empresario e temen que estea a desviar fondos de Industrias Caamaño a outras empresas da súa propiedade co obxecto de pechar as instalacións da Avenida da Cordeda. A este respecto, os delegados sinalan que a factoría segue tendo actividade, pero é o propio dono o que dificulta a adquisición de materiais e polo tanto o cumprimento en tempo dos traballos contratados.

A maiores, os traballadores denuncian que o propietario de Industrias Caamaño está a aplicar unha política de persecución e coacción contra aqueles traballadores que presentaron denuncia no xulgado para poder cobrar os seus salarios. Até o momento xa se produciron dous despedimentos de operarios que denunciaron á empresa por impagamento das nóminas, sendo un dos afectados delegado de persoal.

Ademais, a outro traballador que denunciou a débeda salarial, a empresa, como castigo, deixoulle de pagar dende o pasado mes decembro e estalle a aplicar unha estrita política de control e presión.

cig.prensa@galizacig.com