A CIG-Construción de Ourense denuncia que as empresas das obras do AVE obrigarán a traballar nos festivos do entroido

A Federación da Construción da CIG de Ourense vén de denunciar o incumprimento do convenio colectivo deste sector nas obras do AVE, logo da decisión das empresas concesionarias de continuar traballando toda a fin de semana, o vindeiro luns 23, que é festivo por convenio, así como o martes 24, festa local nos Concellos de Ourense, Maside e o Carballiño. Estes feitos xa foron postos en coñecemento da Inspección de Traballo, mentres se agarda unha solución definitiva para evitar as continúas vulneracións de dereitos que se rexistran nas obras públicas.

Xan Losada, Secretario comarcal da Federación en Ourense, criticou duramente a decisión das empresas, que simultaneamente vulneran os acordos do convenio colectivo para o sector. Ademais de teren que traballar en festivo recoñecidos, os operarios/as terán que facer xornadas de 12 horas continuadas diarias. Losada tamén acusou á administración pública de ser cómplice deste abuso e “mirar para outro lado”.

A Federación xa puxo en coñecemento da Inspección de Traballo estes feitos e solicitou unha reunión coa delegada de Traballo co obxectivo de buscar unha solución a esta situación “dunha vez”. “Dende a Federación da Construción e madeira da CIG imos insistir até que se cumpra o Convenio colectivo, a así tratar de rebaixar o número de parados do sector, xa que aplicando a xornada que establece o convenio, habería que contratar máis traballadores para cumprir os prazos”, explica Losada.

Incumprimentos reiterados

Este non é a primeira ocasión na que se denuncian irregularidades nas obras do AVE de Ourense (hai que lembrar que son das que maiores índices de sinistralidade rexistran). De feito, o pasado 11 de febreiro a CIG-Construción organizou mobilizacións nas catro provincias para denunciar o incumprimento do Convenio do sector, tanto no referido ao exceso da xornada de traballo como as fallas de medidas de seguridade e prevención de riscos.

En relación aos salarios, Losada explica que, na maioría dos casos, as empresas subcontratadas pagan o exceso de xornada por baixo do prezo establecido no convenio colectivo co consentimento da empresa principal, e a complicidade da administración.

Novas relacionadas