O dono de Armarios Alonso négase a negociar, mesmo coa proposta de mediación da Delegación da Xunta en Pontevedra

A CIG-Construción de Pontevedra denunciou que o dono da empresa Armarios Alonso de Sanxenxo rexeitou a proposta do delegado territorial da Xunta en Pontevedra para manter un encontro cos traballadores e coa presenza da administración autonómica como mediadora.

Os traballadores de Armarios Alonso levan case cinco meses sen cobrar e a empresa manten pechadas as portas da empresa desde hai semanas, polo que os traballadores acuden diariamente ao seu posto de traballo á espera de que xudicialmente se lles dea unha solución.

"Non se quere sentar a negociar"

Xaquín Agulla, secretario comarcal de Pontevedra da CIG-Construción,  subliñou que "parece ser que o empresario tamén se lle resiste á Xunta e rexeitou mesmo a petición del delegado para sentarse a negociar" e esta nova situación, explica Agulla, que "pon en entredito incluso a propia autoridade do delegado territorial".

Peche total da empresa

O secretario comarcal da CIG-Construción de Pontevedra manifestou que "a actitude deste empresario non é nin respeitábel nin lóxica nin legal" e critica que o peche da empresa xa non sexa "patronal como semellaba ao principio senón total, xa que mesmo fixo caso omiso da exixencia da Xunta de abrir as portas desta firma".