Educación incrementa un ano máis os fondos públicos destinados á privada

A CIG- Ensino denuncia que a consellaría, entrementres, practica un recorte sistemático, inxustificado e inaceptábel no ensino público

A Consellaría de Educación publica no DOG deste luns, día 20 de agosto, unha orde pola que se modifican os concertos educativos con centros privados vixentes até o curso 2012-2013. A CIG-Ensino denuncia que, mentres Educación practica un recorte sistemático, inxustificado e inaceptábel no ensino público, suprimindo centros, unidades e profesorado, segue a incrementar o número de unidades concertadas con centros privados, incrementando así os fondos públicos para financiar empresas privadas.

A orde publicada hoxe recolle o incremento de unidades concertadas en Educación Infantil en dous centros educativos de Ourense moi próximos dun centro público que vén reclamando o incremento de unidades por demanda de matrícula, tal e como xa se denunciara o ano pasado; unha de primaria en Pontevedra e sobre todo o incremento de unidades concertadas en FP, especialmente nos Ciclos Medios, nos que o número de unidades concertadas se incrementa en 10 (3 na Coruña, 1 en Ourense e 6 en Vigo), 10 unidades que se suman á modificación dos concertos para 34 unidades de ciclos medios, que cambian de especialidade.

A orde tamén recolle a formación en centros de traballo para 38 ciclos formativos (31 medios e 7 superiores) que se realizará entre os meses de setembro e novembro de 2012.

A CIG-Ensino considera totalmente inaceptábel e un insulto á sociedade galega esta nova privatización do ensino e denuncia a intención permanente desta Consellaría en desprestixiar o ensino público e favorecer o privado.

Anexo: cadro de incremento de unidades (incremento final despois de deducidas as unidades que se reducen en cada etapa sinalada):

CONCERTOS EDUCATIVOS
Unidades concertadas que se incrementan
	A Coruña	Ourense	Pontevedra	Galiza
Infantil		2		2
Primaria			1	1
Ciclos medios	3	1	6	10*
Educación Especial	1	1	1	3
* 34 unidades cambian a especialidade

Formación en centros de traballo:
	A Coruña	Ourense	Pontevedra	Galiza
Ciclos medios	12	5	14	31
Ciclos superiores	3		4	7
Total	15	5	18	38