Portada
Temas
Confederal
Sectores
Entrevistas
Opinion
Multimedia
Contacta
 
A Coruña, 21/6/2012
Chuza Menéame del.icio.us
compartir

A FGAMT-CIG de Ferrol esixe ás empresas que fan o transporte escolar que respecten os tempos de descanso do persoal

Os traballadores instan á Xunta a que controle ás compañías porque “está en xogo a propia seguridade dos cativos/as”
A FGAMT-CIG de Ferrol vén de reclamar ás empresas de transporte de viaxeiros que eliminen as xornadas abusivas e sen ningún tipo de control que teñen que facer os condutores/as de autobús, tanto nos servizos discrecionais como de escolares.

Até agora, explica o Secretario Comarcal da FGAMT-CIG, Alexandre Romero, os traballadores/as das empresas preferiron evitar a conflitividade para non provocar trastornos no servizo do transporte escolar da comarca. Porén, unha vez rematado o curso, os condutores/as queren denunciar publicamente a situación na que se atopan e demandar das empresas a que respecten os tempos de descanso do persoal.

O colectivo de traballadores/as lanza unha chamada de atención tamén a Consellaría de Educación, as ANPAS e aos colexios para se impliquen nesta demanda, pois “non se trata só dunha reivindicación laboral, xa que o está en xogo é a propia seguridade dos cativos/as que utilizan este tipo de transporte”, sinala Romero.

Así mesmo, dende a FGAMT-CIG instan á Xunta de Galiza á que controle e tome todas as medidas legais oportunas para obrigar ás empresas a que cumpran cos tempos de descanso dos condutores e condutoras, máis considerando que os servizos de transporte  de viaxeiros/as son concesións administrativas. Sobre esta cuestión, a Federación denuncia que se ten coñecemento de casos nos que a empresa mesmo chegou a romper o disco tacógrafo para que eliminar as probas dos excesos de xornada.

Modificación da normativa

Neste senso, a CIG solicita, unha vez máis, ás administracións competentes que modifiquen a normativa actual para estender a obrigatoriedade de levar disco tacógrafo a todos os servizos de transporte de viaxeiros/as, co obxecto de garantir a máxima seguridade nos desprazamentos. Neste momentos, a normativa europea permite ás empresas de transporte de viaxeiros non utilizar o disco tacógrafo cando as súas rutas son inferiores aos 50 quilómetros, agás que exista unha norma interna dos Estados (neste caso da Comunidade Autónoma) que indique o contrario.

Así as cousas, os traballadores e a central advirten que, se no momento de reactivar os transporte escolar no próximo mes de setembro, a problemática continúa existindo, levaranse a cabo todas as accións e mobilizacións que sexan necesarias.

cig.prensa@galizacig.com