O comité de empresa de Forbo reúnese cun deputado do BNG para que traslade o conflito laboral ao Parlamento galego

O comité de empresa de Forbo mantivo hoxe unha xuntanza co responsábel de Emprego do grupo parlamentario do BNG, Henrique Viéitez, para trasladarlle a problemática derivada do traslado da produción de Mos a Mindelo, en Portugal. O deputado nacionalista comprometeuse a levar o conflito laboral ao Parlamento galego a través dunha moción. Na reunión tamén estiveron presentes os secretarios nacional e comarcal da federación de Químicas e Enerxía da CIG.

Así mesmo, os representantes dos traballadores/as entrevistáronse coa alcaldesa de Mos e co resto do equipo de Goberno para abordar a problemática laboral derivada do peche da empresa dedicada á fabricación de adhesivos.

A rexedora, Nidia Arévalo, amosoulles o seu rexeitamento á decisión da compañía e adiantou que convocará os tres grupos políticos municipais para consensuar unha moción de apoio aos traballadores/as e para reclamar o mantemento de todos os empregos nas intalacións de Mos.