Traballadores/as da plataforma loxística de Pull&Bear en Narón concéntranse contra a paralización na negociación do convenio

Traballadores e traballadoras de Pull&Bear Loxística concentráronse na tarde do martes 20 de xullo diante das instalacións da empresa no Polígono de Río do Pozo, Narón, para denunciar a falta de avances na negociación colectiva, iniciada o pasado mes de xaneiro. Diante do inmobilismo da empresa, que propón unha oferta económica escasa, o persoal acordou comezar un calendario de protestas a partir do vindeiro mes de setembro.

Dende a CIG-Servizos denuncian que a empresa, pertencente ao poderoso Grupo Inditex, pretende tirar para adiante cun acordo laboral que penalizaría aos traballadores/as que se atopen de baixa médica, reducíndolle parte do pago, para con eses cartos abonar a ridícula suba económica que oferta. Ademais, hai que ter en conta que o persoal da planta de Narón percibe uns salarios inferiores aos que cobran os compañeiros/as doutras firmas do grupo que realizan as mesmas tarefas.

Neste senso, a CIG-Servizos de Ferrol critica a avaricia da multinacional, que rexeita a plataforma presentada pola representación do persoal, a pesar dos cuantiosos beneficios que o Grupo acadou o pasado ano e o continuado incremento da súa actividade comercial.

Diante desta actitude, os traballadores e traballadoras acordaron iniciar un calendario de medidas de presión máis contundentes a partir do vindeiro mes de setembro, cando todo o cadro de persoal estea reincorporado das vacacións.