Dez traballadores da construtora Aballe son despedidos improcedentemente e a firma non paga indemnizacións por "non ter fondos"

Un novo caso máis de impago de salarios, despedimentos improcedentes e falta de liquidez dunha empresa, desta volta da Construción, e da comarca de Vigo. Estamos a falar de Construcións e Decoracións Aballe, na que dez dos seus traballadores denuncian o impago dos seus salarios desde o mes de outubro, e o despedimento improcedente destes empregados, recoñecido pola propia empresa, no mes de decembro, sen recibir ningún tipo de indemnización, coa excusa de "non ter fondos" para facer fronte ás cuantias que se lles deben a estes obreiros.

Dez traballadores da empresa de Construcións e Decoracións Aballe, que conta con centros de traballo en Tui e Guillarei, levaban desde outubro sen recibir o seu salario, e no mes de decembro foron despedidos.

A empresa recoñeceu o despedimento improcedente, pero cando tiña que facer efectiva legalmente a cuantia das indemnizacións, esta empresa construtora, através dunha avogada como representante legal, alegou "non ter fondos para facer fronte a estas débedas".

 Despedidos sen indemnizacións

Os traballadores afectados queren denunciar a grave situación pola que están a pasar "sen salario desde o mes de outubro e despedidos sen percibir ningún tipo de dereito a nada".