A CIG presenta a candidatura para as eleccións sindicais en Alcoa San Cibrao

A CIG vén de presentar a candidatura para as eleccións que os vindeiros días 28 de novembro e 2 de decembro se van celebrar en Alcoa-San Cibrao. Os candidatos e candidatas da central nacionalista, que presenta lista nos dous colexios e foi a forza máis votada nos tres últimos procesos electorais, comprometéronse a manter a loita na defensa dos postos de traballo, na esixencia de melloras en materia de seguridade e saúde e na demanda de inversións que garantan o futuro das instalacións.

A CIG-Metal acaba de sacar un número especial do boletín “O Espiño” con motivo da celebración das eleccións sindicais en Alcoa-San Cibrao a vindeira semana, no que se presentan as candidaturas completas da central nacionalista.

Así mesmo, no boletín dáse conta do traballo realizado nestes últimos catro anos polos delegados e as delegadas, así como os compromisos de cara ao futuro. Neste senso, os candidatos e candidatas da CIG márcanse como obxectivos a loita por acadar unha seguridade e saúde real na fábrica; a defensa do poder adquisitivo dos salarios; reclamar da dirección inversións para mellorar, renovar e dar garantías de futuro ás instalacións; incrementar e rexuvenecer o cadro de persoal; conseguir maior estabilidade na contratación e reducir a subcontratación; ou acadar melloras no convenio colectivo en materia de igualdade ou no desenvolvemento da Mesa polo Emprego.    

Podes consultar o número completo de “O Espiño” descargando o arquivo adxunto a esta nova.

O Espiño 61.pdf