O persoal do 112 non descarta ir á folga se continúa sen recoñecerse o dereito á subrogación

Os traballadores e traballadoras do CAE 112 de Galiza non descartan ir a unha folga se continúa sen ofrecerse unha solución definitiva a súa situación laboral. Así o anunciou en rolda de prensa o Secretario do Comité, Óscar Valladares, quen tamén sinalou que van solicitar reunións cos candidatos dos tres grupos políticos maioritarios para coñecer a súa postura arredor deste servizo público.

Valladares, que estivo acompañado pola Secretaria do Comité do 112, Isabel Moares, e o membro da Executiva Comarcal da CIG de Compostela, Inácio Pavón, explicou que esta iniciativa da continuidade á campaña iniciada polo persoal do 112 para dar a coñecer publicamente a situación laboral na que se atopan e reivindicar unha maior estabilidade.

Os representantes dos traballadores e traballadoras vanse dirixir aos candidatos dos tres grupos políticos con representación para solicitar unha reunión con cada un deles, de cara a coñecer a súa postura a respecto da xestión do CAE 112. “Se as respostas non son satisfactorias e non axudan a por fin a este conflito, non descartamos convocar unha folga”, indicou Óscar Valladares.

A principal demanda do persoal deste servizo céntrase na cuestión da subrogación, que a administración continúa sen querer asinar, que a administración continúa sen querer asinar. 

Escusas dende a administración

Pola súa banda, Presidencia da Xunta néganse a asumir esta cuestión alegando que se trata dunha tentativa de “entrar na administración pola porta de atrás”. Dende o 112 lembran que a subrogación non dotaría de novos dereitos aos traballadores/as e mesmo a empresa concesionaria ten emitido un informe favorábel neste punto. “Concedernos a subrogación significaría que o persoal do 112 estaría adscrito ao servizo público directamente e non suxeito a unha contrata, daríanos máis estabilidade pero non dereitos relacionados co funcionariado”, aclarou.

Dende o Comité do 112 reclaman á administración que recoñeza o dereito á subrogación para acadar definitivamente unha solución á situación laboral que padecen, pois existe un principio de acordo entre traballadores e empresa nas restantes reivindicacións. Ademais, continuarán acudindo a todos os actos de campaña nos que participe o presidente Emilio Pérez Touriño, por ser o responsábel último de todas as contratas da Xunta.

Novas relacionadas 

Máis información en 112enloita.blogspot.com