Delegados e delegadas de A Mariña participan nunha xornada sobre saúde laboral e EREs

O Gabinete técnico de Saúde laboral e a Comarca de A Mariña organizaron o 23 de abril unha xornada/asemblea para delegadas e delegados da comarca. Ao acto, que tivo lugar en Viveiro, asistiron cincuenta delegadas e delegados de distintas empresas radicadas na comarca e de diferentes sectores (mar, construción, administración, metal e saude), que puideron informarse arredor dunha cuestión moi presentes nestes tempos: os expedientes de regulación de emprego.

 A xornada iniciouse ás 10 da mañá  e rematou as 18 horas. Na primeira parte as compañeiras da asesoría da CIG de Mariña informaron do que é un Expediente de Regulación de Emprego, como se tramita , consecuencias, etc.dende un punto de vista teórico.

Mentres que traballadores e traballadoras de empresas afectadas por un ERE (como é o caso da fábrica  Sargadelos, Costiñas, ou Gres Burela) deron unha visión “máis práctica, máis real e mais próxima”, segundo sinalaron dende a CIG de A Mariña.

Xa na segunda parte da xornada, a técnica do Gabinete de Saúde Laboral, Ana Isabel Santiago, disertou arredor da prevención de riscos na Negociación Colectiva.

O acto serviu tamén para presentar a campaña do vindeiro Día da Clase Traballadora e repartir o material para a manifestación que se vai levar a cabo o 1 de Maio, que desta volta será en Foz.