Máis de 2.000 persoas percorren ás rúas de Vigo contra a privatización da sanidade pública

Unhas 2.000 persoas percorreron as rúas de Vigo na tarde do xoves dende o Hospital Xeral de Vigo até a Dirección Provincial do Sergas para protestar, unha vez máis, contra as intencións do goberno do PP de privatizar a sanidade pública. Dende a CIG-Saúde denuncian os planos para a creación do novo hospital de Vigo, cuxo financiamento e construción a Xunta pretende que sexa privado, “eliminando así moitos postos de traballo públicos e pechándolle as portas a centos de traballadores/as que están nas listaxes de contratación”.

Persoal sanitario e cidadáns/ás volveron encher  na tarde do xoves 22 de abril as rúas de Vigo con berros en contra dos plans de privatización da sanidade pública. Coa marcha, convocada pola Xunta de Persoal do CHUVI, quérese denunciar o proxecto de financiación a través de empresas privadas do novo hospital, así como a privatización de numerosos servizos non sanitarios.

Concentración na dirección do Sergas

Pola mañá, membros da Comisión de Centro do CHUVI concentráronse  diante da Dirección Provincial do Sergas para apoiar aos compañeiros e compañeiras que entraron en dito organismo para esixir unha xuntanza coa Conselleira. Unha vez conseguido o obxectivo de que o luns 26 de abril se concretará a data da cita,  os membros da Comisión de Centro abandonaron o recinto.

Dende a CIG-Saúde adiantaron que as mobilizacións continuarán nos vindeiros días e lembraron que este domingo está convocada unha gran manifestación en Compostela contra a privatización dos servizos públicos.

Galería de imaxes