Paros e protestas en Unísono de Vigo contra os despedimentos, o abuso e a represión na empresa de telemárketing

Arredor dun cento de traballadoras/es e delegadas/os sindicais de Unísono secundaron hoxe os paros e as concentracións de protesta convocadas polo comité para esixir a readmisión das compañeiras despedidas e denunciar os abusos e o acoso por parte da empresa de telemárketing con sede en Vigo. Dende a CIG rexeitan a implantación dun novo sistema de seguimento porque entenden que suporá novas rescisións de contrato.

As protestas diante de Unísono, na Gran Vía de Vigo, desenvolvéronse de 12.00 a 13.00 horas, coincidindo co paro convocado na empresa para reclamar a readmisión de dúas empregadas que foron despedidas por denunciar acoso laboral dunha superiora. Pola tarde terán continuidade entre as 16.00 e as 17.00 horas.

O comité convocou novas mobilizacións para esixir a reincorporación das traballadoras e para denunciar a política de abusos e represión. Ao mesmo tempo, dende a CIG sinalaron que a implantación dun sistema de seguimento das campañas traducirase en máis despedimentos.