O V Congreso de CIG-Ensino dá comezo coa presentación do Informe de Xestión

O V Congreso de CIG-Ensino comezaba ás 10:30 da mañá deste sábado 24 de outubro coa presentación do Informe de Xestión. Un documento que fai un percorrido pola acción sindical desenvolvida durante este período, caracterizado pola súa conflitividade mais tamén polos acordos acadados, que supuxeron importantes melloras nas condicións de traballo e nas retribucións. Porén, se por algo destaca esta etapa é polo importante incremento da afiliación, nun 40%, o que reforza o modelo sindical practicado e sitúa á CIG-Ensino como sindicato máis representativo no sector e como referente non só entre o profesorado senón ante o conxunto da sociedade galega

O secretario nacional de CIG-Ensino, Anxo Louzao, que foi o encargado de presentar o Informe de Xestión da Executiva, salientou a grande conflitividade pola que se caracterizou este período que coincidiu en grande parte co goberno bipartito e neste último ano coa chegada de novo do PP, o que comportou “un retroceso tanto nas relacións sindicais como nas posibilidades de negociación e unha involución sen precedentes na normalización lingüística.

Defensa do ensino público

Nese sentido, Louzao denunciou que o inicio deste curso viu precedido dunha “actitude despótica e antidialogante da consellaría, que se valeu do verán para aplicar toda unha serie de medidas involucionistas”, que resumiu en: redución do profesorado nos centros; envío de interinas/os ao paro; profesorado funcionario de carreira sen colocar; demanda de profesorado polos centros que non é atendida; supresión de 156 unidades e 249 postos dos que 23 corresponden a centros que pechan; eliminación das galescolas; sobrecarga de traballo administrativo ao profesorado, por falta de administrativos/as, para xestionar a supresión da gratuidade dos libros de texto...

Unha situación que xa derivou na convocatoria dunha folga os días 9 e 10 de setembro, sen ter iniciado o curso, nas Escolas Oficiais de Idiomas, por exemplo. O secretario nacional de CIG-Ensino acusou ao PP de ter aproveitado as vacacións do verán para levar a cabo “un sen fin de medidas regresivas e impedir calquera contestación social”, desde a publicación dos concertos educativos, pasando pola oferta dos PCPI ou a sinatura do acordo de agrupamentos en plenas vacacións do profesorado, até a publicación da enquisa-trampa contra o galego. “Os obxectivos do novo goberno están claros: desmantelamento do ensino público e persecución do galego”, asegurou.

A loita pola normalización lingüística

No seu percorrido polos diversos ámbitos nos que desenvolveu o seu traballo a CIG-Ensino, salientou os pequenos avances acadados en materia de normalización destacando a consolidación do Correlingua, a aprobación do Decreto de uso do galego, valorado positivamente malia non recoller maioritariamente as demandas da CIG “por canto supoñía un avance en prol da normalización lingüística” e a mellora e recoñecemento do labor dos Equipos de Normalización.

Porén, o secretario nacional de CIG-Ensino, fixo especial fincapé no Decreto xa que, ao seu entender, a súa publicación marcou un punto de inflexión na estratexia lingüística do PP que tivo consecuencias para o futuro. “Ao día seguinte da súa publicación e amparándose na discrepancia dun reducido grupo, contrario ao ensino do noso idioma, iniciou unha campaña que se foi incrementando en intensidade durante a campaña electoral de 2009 e que se fundamentou na mentira da imposición da nosa lingua no ensino”, dixo.

Un posicionamento co que comezaba a andar o camiño cara a súa derrogación e para ir eliminando a presenza do noso idioma en todos os ámbitos. Por iso advertiu que isto “exixirá de nós unha atención e presenza constantes, debendo ser a demanda de normalización do noso idioma un dos elementos centrais da acción sindical nos vindeiros catro anos”.

A conflitividae derivada da aplicación da LOE

No referido á acción sindical desenvolvida pola CIG-Ensino durante estes últimos catro anos, Louzao salientou a aprobación e desenvolvemento da LOE, que provocou toda unha serie de conflitos por incidir na privatización do ensino e ignorar as demandas do profesorado e porque a súa aplicación comportaba, ademais, a redución de até un 43% da carga lectiva en materias como Tecnoloxía, Música e Educación Plástica fronte a relixión, á que se lle incrementaba a carga horaria. Foi grazas á mobilización “na que as outras organizacións sindicais nin sequera participaron, polo que a consellaría viuse obrigada a incrementar, mediante unha proposta enviada ao Consello Escolar de Galiza, a carga horaria destas materias nunha hora máis”.

A materia de relixión tamén foi cuestionada cando se presentou o proxecto de decreto para Bacharelato que reducía nunha hora a carga horaria de materias como Filosofía e Cidadanía, Historia e Educación Física, mentres mantiña intacto o ensino de relixión. Co apoio dos colectivos máis directamente afectados “fomos capaces de levar a cabo numerosas mobilizacións que tiveron un importante apoio do profesorado, abrindo un debate a prol do laicismo e en contra do adoutrinamento relixioso no ensino”, explicou Louzao.

Tamén derivou nunha campaña a publicación, sen previo aviso, da Orde que fixa os currículos das optativas de bacharelato a ofertar nos centros e que supuña, a eliminación de materias como a Literatura Galega do século XX e a Xeoloxía. Grazas ao papel de CIG-Ensino, lembrou Anxo Louzao, restabeleceron como optativa a Literatura Galega do s.XX e vén de facerse o mesmo coa Xeoloxía.

Mellora das condicións laborais e salariais

Canto ás condicións laborais, o secretario nacional de CIG-Ensino manifestou a súa especial satisfacción por ter conseguido “arrincar”, no ano 2007, un acordo da consellaría para ampliar o profesorado dos centros de infantil e primaria e mellorar as condicións laborais deste profesorado; que se incluíse, na disposición transitoria segunda da LOE, o dereito a poderse xubilar anticipadamente; que se acadaran importantes avances na conciliación da vida laboral e familiar; que se ofertaran máis prazas de vacantes para os concursos de traslados; que se melloraran as condicións de traballo do profesorado itinerante e que o propio Valedor do Pobo tivera que lembrar á administración a súa obriga de garantir as revisións médicas anuais a todas e todos os docentes do ensino público.

Tamén destacou a sinatura dun acordo retributivo polo que a cantidade a percibir era de 150 euros lineais ao mes para todo o profesorado a aplicar nun prazo de dous anos. Unha mellora urxente porque o profesorado galego era o peor pagado do estado. A CIG-Ensino conseguiu tamén as pagas extra íntegras; o recoñecemento dos mesmos dereitos económicos e administrativos dos coordinadores/as dos Equipos de Normalización cás xefaturas de departamento e os dereitos dos interinos/as a cobrar trienios.

Un dos problemas aínda sen resolver e ao que se lle vén dedicando especial esforzo é a loita pola estabilidade e a mellora das condicións de traballo do profesorado interino e substituto. Aínda así, para Louzao  nas amplas ofertas de emprego influíu, “sen lugar a dúbidas, a loita que o colectivo de interinos/as e a CIG vimos levando a cabo (no curso 2005/2006, sobre todo), e o acordo asinado sobre o incremento do cadro de persoal dos centros de infantil e primaria".