A CIG-Valdeorras denuncia que un traballador de Construcciones Rodribar foi agredido fisicamente polo propietario da empresa

A Unión Local da CIG de Valdeorras denuncia enerxicamente a agresión sufrida por un traballador da Construcciones Rodribar e amosa a súa solidariedade co afectado e coa súa familia. A central nacionalista agarda que a Xustiza actúe de xeito exemplar contra o propietario da empresa como presunto responsábel de agresións verbais e físicas.

Para o sindicato, as prácticas do empresario Jaime Rodríguez Barba “son propias da época da escravitude” e anima os xuíces a reprimilas de xeito contundente. Dende a CIG sosteñen que tiñan constancia de que esta persoa “vexa e humilla os seus empregados/as”, pero consideran especialmente grave que agora chegase a unha agresión física. Tamén o fan responsábel de proferir contra o afectado frases racistas como “portugués de merda”.

Dende a Unión Local de Valdeorras reclaman que os feitos non queden impunes e animan a todos os traballadores e traballadoras a facer valer os seus dereitos e denunciar calquera trato vexatorio.