Os traballadores de Inclima, en folga para reclamar o pagamento dos atrasos salariais

Os traballadores de Inclima, empresa de frío industrial asentada en Narón, levan tres días en folga para reclamar o pagamentos dos atrasos salariais e a rescisión dos seus contratos. A empresa, que se atopa nunha situación económica problemática, leva sen facer fronte ás súas responsabilidade económicas cos 20 operarios dende o pasado mes de outubro, polo que a maioría do persoal tivo que recorrer á vía xudicial para solicitar a rescisión do contrato.

Logo de 5 meses sen percibir os seus salarios, os traballadores de Inclima iniciaron o martes unha folga indefinida para esixir o pagamento das contías adebedadas e denunciar publicamente a penosa situación á que se viron abocados. Así, o martes levaron a cabo tamén unha concentración diante das instalacións da empresa no Polígono de As Lagoas e o mércores trasladaron as protestas até o Consistorio de Narón.

Segundo explican dende a CIG-Metal de Ferrol, a maioría dos traballadores xa ten demandado á empresa para solicitar a rescisión dos seus contratos por incumprimento do contrato, mentres que para o resto do persoal estanse negociando despedimentos (improcedentes) para así poder acceder ao cobro das prestacións do Fogasa. Neste senso, na xornada de onte os representantes dos traballadores mantiveron unha xuntanza coa empresa para tentar chegar a un acordo sobre este punto.