Os/as traballadores/as dos servizos de hostalería da Arsenal Militar de Ferrol están sen cobrar dende marzo

A CIG-Servizos denunciou a situación na que se atopan os traballadores e as traballadoras de PQM, concesionaria dos servizos de hostalería do Arsenal Militar de Ferrol, aos que a empresa lles debe os salarios de marzo e abril. A situación vén repetir a imaxe dos últimos anos cando a anterior concesionaria, Los Lebreros, procedía sistematicamente ao impagamentos das nóminas.

Cristina Martínez Padín, da CIG-Servizos de Ferrol, explicou que na reunión mantida coa Marina hai dúas semanas,  o ente estatal indicou que a situación de falta de pago produciuse porque a empresa concesionaria non foi quen de entregar a tempo unhas facturas. Por este motivo tampouco puido facer fronte aos pagamentos, a pesares de que “estes “contratempos” debería telos previstos”.

Non obstante, continúa Padín, na xuntanza mantida na tarde do luns entre a representación dos traballadores/as e a Marina, esta informou que xa efectuara o pagamento á empresa, así como que PQM, “despois de ser chamada a capítulo, faría os pagos o mércores 26 de maio”.

Esta situación devolve á actualidade a imaxe do ano pasado, cando os traballadores e traballadoras do Arsenal tiveron que recorrer ás mobilizacións e á vía xudicial para conseguir que a anterior concesionaria, Los Lebreros, fixese fronte as súas obrigas. Co cese do contrato e a subrogación do persoal á nova empresa semellaba que os problemas ían rematar, mais parece que as prácticas vólvense repetir.