A CIG de Lugo estuda presentarse como acusación particular no caso do último accidente laboral rexistrado na cidade

A CIG de Lugo manifestou a súa indignación por un novo accidente mortal acontecido no barrio lucense de As Gándaras o día 23 de xuño. De feito, a central estuda presentarse como acusación particular e reclama ás administracións que aclare as causas do sinistro, así como a aplicación rigorosa da normativa vixente, a fin de evitar que se repitan sucesos “tan lamentábeis” como o acontecido o martes, e que supuxo o falecemento dun traballador e que outro resultase ferido de gravidade.

No momento do accidente dous traballadores da empresa Mármoles Traseira dispúñanse a trasladar de fachada unha estada metálica, momento no que contactou cunha liña eléctrica de media tensión. A consecuencia do choque eléctrico un dos traballadores resultou ferido de gravidade, polo que foi trasladado á Coruña con queimaduras importantes, e o outro faleceu debido aos danos producidos pola corrente eléctrica.

"Dende a CIG agardamos que dende as administracións competentes se realice o maior esforzo por aclarar as causas do accidente e igualmente se aplique a maior rigorosidade na aplicación da lexislación co fin de evitar a repetición de sucesos tan lamentables coma este, do mesmo xeito estudamos presentarnos como acusación particular. Así mesmo, queremos trasladar todo o noso apoio aos compañeiros e familiares das vítimas”, sinalan dende a CIG de Lugo.

Falta de formación

Unha vez máis, o ocorrido podería evitarse de terse cumprido co establecido na lexislación vixente. A estada constaba de tres alturas e non se gardou a distancia regulamentaria ás liñas eléctricas, xa que de feito a altura da estada superaba a altura da propia liña eléctrica.

Por outra banda, dende a CIG de Lugo sinalan que todo parece indicar que a empresa non impartira aos traballadores a formación requirida para as operacións que se estaban a realizar.

Deste xeito, a normativa prevé que antes de iniciar traballos en proximidade de elementos en tensión un traballador capacitado, designado pola empresa, determine a viabilidade dos traballos e, de seguir adiante, as zonas de perigo deben protexerse.