Empregadas/os e delegados/as da CIG en Unísono esixen cunha protesta a readmisión das compañeiras despedidas por denunciar acoso

Empregadas/os e delegados/as da CIG concentráronse hoxe fronte ás instalacións de Unísono en Vigo en solidariedade coas compañeiras despedidas pola empresa de telemárketing por denunciar ante a dirección acoso laboral por parte dunha xefa. Dende a central nacionalista esixen a readmisión das dúas traballadoras e o cese cautelar da supervisora da campaña de Gas Natural mentres non se investiguen os feitos, ao tempo que critican que con esta actitude a compañía “pretende implantar un réxime de terror nesta campaña para conseguir as máximas vendas”.

A protesta para reclamar a readmisión das dúas traballadoras desenvolveuse diante do centro de traballo de Gran Vía 110 de 12.00 a 13.00 horas, onde arredor de medio cento de persoas berraron consignas contra a represión na empresa e en solidariedade coas compañeiras.

Tamén aproveitaron para despregar  unha faixa co lema "Non máis represión en Unísono. Readmisión xa!" e para repartir panfletos informativos entre os veciños/as.

Dende a sección sindical da CIG en Unísono explican que os despedimentos producíronse despois de que as empregadas remitisen un escrito á dirección denunciando o que consideraban trato humillante por parte da supervisora da campaña da Gas Natural. “Pero a empresa, no canto de investigar un posíbel caso de acoso, decide despedilas inxustamente”.

Con este actitude -censuran- a compañía pretende implantar un réxime de terror na campaña de Gas Natural para conseguir o máximo beneficio a calquera prezo, “en menoscabo da dignidade, a saúde e o dereito a traballar das persoas”.

Diante disto, esixen a readmisión das compañeiras e o cese cautelar da supervisora até que non se investiguen os feitos obxecto da denuncia.