Pecha unha empresa, auxiliar do automóbil de Vigo, e despide a máis de 20 traballadores/as no período de vacacións

Existen sospeitas de que Correa Montajes y Suministros SL presuntamente abriu a mesma firma en Portugal

A CIG-Metal de Vigo denunciou, a través dun comunicado de prensa o martes 25 de agosto, o despido dos máis de 20 traballadores da empresa Correa Montajes e Suministros SL no periodo vacacional. O empresario enviou ás cartas de despido por correo, vendeu a maquinaria e aproveitou o mes de vacacións para pechar a empresa. Existe a sospeita entre o persoal de que o empresario poda ter aberto a mesma firma, auxiliar da automoción, no norte de Portugal. Ademais a dirección da empresa xa adiantou que non pagara as indemnizacións polos despedimentos "por non ter cartos para facer fronte ás mesmas".

A empresa Correa Montajes y Suministros SL, situada na rúa Gandariña 19, nave 6, en Vigo, dedicada ao corte e conformado de tubos para o sector do automóbil pechou definitivamente durante o período de vacacións deixando na rúa a máis de 30 traballadores/as.

Sen previo aviso

Esta empresa pechou as instalacións sen previo aviso aos traballadores/as, aproveitando o período de vacacións para sacar toda a maquinaria da empresa e mandar as cartas de despido aos traballadores/as da empresa.

Acumulaba impago de salarios

Esta firma xa adebedaba varios meses de salario ao persoal, ademais que desde a dirección da empresa xa adiantaron que non ían pagar a día de hoxe as indemnizacións por despedimento alegando que non hai cartos para afrontar estes pagamentos.

Sospeitas de deslocalización

O persoal desta auxiliar do automóbil sospeita que é probábel que tanto o traballo como a maquinaria fora trasladada polo empresario ao norte de Portugal.

Antón Bendaña, da Executiva Comarcal da CIG-Metal de Vigo, criticou estes despedimentos e denunciou "a mala fé do empresario que fuxiu e mesmo deu de baixa o teléfono e o fax para que fora imposíbel contactar coa empresa".

Bendaña explicou a difícil situación na que se encontran agora á volta das vacacións as e os despedidos "coa empresa pechada, co impago de salarios acumulados e sen posibilidade polo de agora, ao parecer, de cobrar as indemnización".