Posición da CIG ante o anuncio dun posible SIP de Caixa Galicia con Caja Madrid

Na mañá deste venres día 26 de marzo, a Dirección de Caixa Galicia transmitía ao persoal da entidade, a través dunha multiconferencia, que o vindeiro luns día 29 de marzo pasaría a traballar para nunha nova empresa. Indicaron que dado a falta de avances na fusión galega este fin de semana anunciarían un SIP. Algúns dos Directores Territoriais foron máis explícitos, afirmando que o luns asinaríase un acordo con Caja Madrid.

Semella que nestes momentos estase decidindo o futuro financeiro de Galiza. Unha decisión que marcará a economía deste país para os vindeiros anos.

De ser certo que ambas as partes están hoxe sentadas, desde a CIG queremos pedirlles ás Direccións de Caixa Galicia e Caixanova que afronten este proceso coa máxima xenerosidade deixando de lado os seus intereses persoais, familiares ou de grupo.

Galiza, que ambas levan no seu lema (a nosa Caixa e a Caixa galega do seculo XXI), debe primar hoxe na súa decisión demostrando o seu compromiso coa sociedade na que naceron e medraron.

O SIP de Caixa Galicia con Caja Madrid sería unha alianza liderada pola caixa madrileña. Así mesmo, Caixanova tampouco lideraría ningún dos SIP coñecidos até o de agora. Estaríamos pois ante a desaparación definitiva das Caixas de Aforros.

Os SIP ademais son un ataque á natureza fundacional das Caixas, coa creación dun Banco cara o que traspasarían gran parte das políticas financeiras en materia de riscos, activo, ou investimentos. Un instrumento semellante levou á privatización e desaparición das Caixas de Aforros en Italia.

A CIG lamenta ademais que a Dirección de Caixa Galicia utilizase irresponsablemente un medio tan pouco oficial para trasmitir unha información deste alcance ao persoal sen contar, por outra parte, coa representación legal dos traballadores e as traballadoras.