Concentración no SMAC en demanda da readmisión do traballador despedido en Frangosa Servizos

A empresa optou polo despedimento improcedente en vez de recolocar ao operario, con problemas de saúde, nun posto no que a doenza non interfira na súa actividade

Delegados e delegadas da CIG de Ferrol concentráronse esta mañá ás portas do SMAC en apoio a un traballador con problemas de saúde que Frangosa Servizos despediu incumprindo a Lei de Prevención de Riscos. O acto de conciliación, ao que por parte da empresa só asistiu o avogado, rematou sen acordo.

Frangosa Servizos, auxiliar de Forestal do Atlántico, despediu de xeito improcedente a un traballador con problemas de saúde que o limitan para o desempeño de determinados postos da empresa. Aínda que o operario vén padecendo estes problemas dende hai anos, o posto de traballo no que realizaba a súa actividade laboral permitíalle desenvolver a mesma sen ningún tipo de impedimento.

Non obstante, a empresa decidiu recentemente incorporalo nun novo posto para o que a súa doenza si lle supón algunhas dificultades. Porén, denuncian dende a Federación de Químicas de Ferrol, Frangosa Servizos optou polo despedimento improcedente “no canto da recolocación noutro posto de traballo como así o esixe a lei de Prevención de Risco Laborais, no que se refire a traballadores e traballadoras especialmente sensíbeis”.

Dende a CIG-Químicas e Enerxía xa advertiron que continuarán adiante coas mobilizacións até que a empresa mude a súa actitude e readmita ao traballador.