A CIG denuncia na Fiscalía os responsábeis de “Servicios Sanitarios de La Coruña”

Esta empresa de ambulancias obrigou un condutor a traballar como padioleiro pese a que sabía que padecía de hernia discal

A CIG Transporte presentou, o 27 de maio no Palacio de Xustiza de A Coruña, un escrito na Fiscalía contra o encargado e o xerente da empresa de ambulancias “Servicios Sanitarios de La Coruña”, ao estimar que son autores dun delito de lesións por imprudencia e doutro de risco.

O traballador, no centro da imaxe, flanqueado por Xesús Pastoriza (esquerda) e Ernesto López Rei, na entrada do Palacio de Xustiza de A Coruña (27-05-2008).

Ambos directivos cambiaron de categoría un condutor e obrigárono a exercer de padioleiro, a sabendas de que padecía dunha hernia discal cervical derivada dunha sobrecarga de traballo, como así certificou a Seguridade Social. Aos cinco días de prestar servizo como padioleiro, o empregado sufriu unha recaída da súa lesión, polo que actualmente se atopa de baixa por accidente de traballo, como recoñece a propia mutua.

A CIG-Transporte considera que o encargado, Mariano Moares Rial, e o xerente da empresa, Enrique Blanco Manzano, puxeron en perigo a integridade física do traballador e, por tanto, a Fiscalía ten elementos suficientes para actuar neste caso contra os responsábeis de Servicios Sanitarios de La Coruña.