Manifestación en Pontevedra en defensa dos postos de traballo en Treves

As traballadores do centro de Treves-Galicia da Avenida de Vigo manifestáronse na mañá do 24 de xullo polas rúas de Pontevedra acompañadas de delegados/as e representantes sindicais da CIG exixindo a retirada do ERE que a multinacional ten presentado e na defensa dos seus empregos. A marcha rematou coa participación dos manifestantes no pleno municipal no que se aprobou a moción a favor da loita das traballadoras de Treves-Galicia.

Os manifestantes, que saíron dende a Pasantería e percorreron as rúas de Pontevedra, exixiron a retirada do ERE e a paralización do proceso de deslocalización da fábrica, na última xornada da semana de folga convocada no centro que Treves posúe na Avenida de Vigo, e logo de que o clúster do automóbil se comprometera a mediar no conflito.

 

A marcha rematou por volta das doce e media, cando unha parte dos manifestantes pasaron a ocupar os asentos do Auditorio, a onde se trasladou a celebración do Pleno municipal. Na sesión íase votar a moción de apoio á loita do persoal de Treves, a prol do mantemento do emprego na factoría e rexeitando o expediente de regulación, que suporá a supresión dos contratos das 133 traballadoras.

 

A iniciativa foi aprobada por todas as forzas políticas con representación na Cámara municipal. Posteriormente, a mobilización trasladouse até o centro de Treves en O Campiño, onde as traballadoras levaron a cabo unha concentración en sinal de protesta polo ERE e exixindo a continuidade dos seus postos de traballo.

Concentración en Compostela

A asemblea do persoal, celebrada a última hora da mañá do venres, acordou fretar varios autobuses até Compostela para poder realizar unha concentración o vindeiro xoves 30 de xullo, diante do complexo administrativo de San Caetano. O motivo da protesta é reclamar aos conselleiros de Traballo e Industria que respondan á solicitude do persoal para manter unha xuntanza.