Os comités de SEAGA realizan un acto simbólico para chamar a atención da Xunta de Galiza e da cidadanía

Os comités provinciais de SEAGA realizaron esta mañá en Compostela, unha acción de protesta simbólica para denunciar a precaria situación na que se atopa a empresa pública, que na actualidade só conta, no seu cadro de persoal con 200 traballadores  e traballadoras para realizar labores que o ano pasado, a esta alturas,  desenvolvían preto de 1.200. O acto consistiu no peche da Porta Santa –pola que non se puido acceder durante unha hora- e o despregue dunha faixa como chamada de atención pola total pasividade da Xunta de Galiza, que se nega a explicar aos traballadores o rumbo que vai tomar a empresa.

Con esta acción, os comités queren denunciar a hipocrisía da Xunta de Galiza, que inviste cantidades millonarias en promocionar o Xacobeo como alternativa económica  e xeradora de emprego, mentres nin sequera executa os orzamentos previstos para SEAGA neste ano, 2010. Estes orzamentos permitirían realizar o investimento necesario para contratar persoal suficiente e manter os postos de traballo de persoal de servizos agropecuarios e forestais.

Abandono do medio rural desde a administración

Os comités de SEAGA denuncian tamén o abandono ao que se está abocando ao medio rural desde a administración, o que pode repercutir gravemente nun incremento dos incendios forestais durante este verán, ao non se pór en marcha as tarefas de prevención, limpeza, desbroce, recollida de madeira, repoboacións...

Tamén denuncian o recorte dos servizos aos gandeiros, desde veterinarios até atención telefónica (CIAG).

Os comités consideran que esta política de desmantelamento progresivo dos servizos que até o de agora viña prestando SEAGA teñen como obxectivo último a súa privatización. Unha política semellante á que se está a desenvolver con outros servizos públicos e entes adscritos á administración.

Desde os comités anuncian que as mobilizacións continuarán nos vindeiros días.