Os integrantes da Mesa do Plan de Dinamización da Ría de Ferrol solicitan á Consellaría do Mar unha xuntanza urxente

As organizacións que integran a Mesa do Plan de Dinamización da Ría de Ferrol (CIG, CCOO, UGT e as Confrarías de Ferrol, Barallobre e Mugardos) mantiveron o xoves 27 unha reunión na que acordaron solicitar de xeito conxunto á Consellaría de Mar que convoque unha xuntanza urxente da mesa de negociación para abordar a situación actual da ría e as condicións nas que se atopan os mariscadores/as.

Nesta xuntanza, os integrantes da Mesa queren tratar a situación na que se atopan os mariscadores e mariscadoras, así como o futuro da propia ría de Ferrol, pois entenden que a contaminación das augas é un problema transversal que afecta a toda a cidadanía e que polo tanto “é responsabilidade de todas as administracións (local, autonómica e estatal) a súa solución”.

Neste senso, lembran que o colectivo de mariscadores/as padecen as consecuencias directas desta problemática medioambiental, ao perder a posibilidade de traballo. “Neste momento, denuncian, a Consellaría pretende de maneira unilateral cambiar as condicións do Plan de Rexeneración desta ría, abandonando a este colectivo sen posibilidades de traballo e sen alternativa de futuro”.