CIG-Servizos de Ferrol amosa a súa satisfacción polos resultados acadados nas eleccións sindicais nos Supermercados DIA

A CIG-Servizos de Ferrol amosa a súa satisfacción polos resultados obtidos nas eleccións sindicais celebradas o pasado xoves 27 de maio en “DIA Supermercado”, nas que houbo unha elevada participación. As eleccións eran a nivel provincial e escollíase un comité de 13 representantes. O anterior estaba conformado na súa totalidade polo sindicato FETICO. Porén, tras deste proceso FETICO fica con 6 delegos/as, a CIG obtén 3 representantes, 2 CCOO e 3 a UGT.

Segundo informan desde a CIG-Servizos de Ferrol esta era a terceira vez que se repetía o proceso electoral porque, como lle consta á central sindical, a empresa intentou por todos os medios que non se puidese presentar, o que provocou a interposición de demandas dos anteriores procesos.

CIG-Servizos denuncia que DIA é unha empresa na que hai unha grande precariedade laboral e onde o anterior comité non respostou ás demandas das traballadoras desta empresa. A maioría das traballadoras sofren o abuso desta cadea de alimentación, con pouco persoal nas tendas, mobilidade continua sen previo aviso e sen un calendario laboral para conciliación.

“Con esta nova aposta das traballadoras”, din, “comeza unha nova etapa neste supermercado” e comprométense a encetar un xiro na política de persoal, tal e como están demandando as traballadoras, para obrigar á empresa a que se faga realidade.