A corporación municipal de Mos aproba en pleno unha moción para reclamar o mantemento de todos os postos de traballo en Forbo

A corporación municipal de Mos aprobou hoxe por unanimidade unha moción solidaria cos traballadores/as da empresa Forbo, cuxa dirección vén de anunciar que pecha a fábrica para trasladar a produción a Portugal. Os tres grupos políticos con representación (PP, PSOE e BNG) ratificaron un texto no que se expresa o apoio institucional aos afectados/as e se lle reclama á compañía que manteña todos os empregos no concello de Mos.

Os tres grupo políticos amosaron o seu apoio ás reivindicacións dos traballadores/as no pleno ordinario do mes de xuño celebrado esta tarde no Pazo de Mos, ademais de trasladarlle á empresa a necesidade de que manteña todos os postos de traballo na localidade.

Na moción instan tamén o Goberno español e a Xunta de Galiza a "realizar as xestións precisas para evitar a deslocalización da empresa e a conseguinte perda de actividade económica e de postos de traballo no municipio". Un grupo de traballadores/as, membros do comité e representantes sindicais da CIG (entre eles os secretarios nacional e comarcal da federación de Químicas e Enerxía) e CCOO estiveron presentes na sesión.