Portada
Temas
Confederal
Sectores
Entrevistas
Opinion
Multimedia
Contacta
 
Vigo, 28/6/2012
Chuza Menéame del.icio.us
compartir

Fracasan as negociacións entre a dirección de Correos e os carteiros/as de Vigo, que manteñen a folga indefinida

Os afectados/as abandonaron hoxe o peche nas instalacións da empresa e mañá realizarán unha protesta en Santiago
Os carteiros/as de Vigo decidiron continuar coa folga iniciada o pasado día catro -e que dende o 22 afecta a toda a xornada- para protestar pola eliminación de 13 postos de traballo na zona de reparto do centro da cidade despois de que non lograsen un acordo na xuntanza mantida coa dirección de Correos. Hoxe mesmo decidían abandonar o peche que mantiñan nas instalacións da compañía e mañá trasladaranse a Santiago para protestar diante da dirección territorial do ente estatal.

O peche na central de Correos en Vigo, que durou nove horas, tiña por obxecto forzar os responsábeis da compañía a manter unha xuntanza cos representantes dos traballadores/as, polo que se suspendeu unha vez que a reunión se produciu. Dende a CIG explicaron que non foi posíbel chegar a un acordo porque a empresa non se move da súa posición e négase a dar marcha atrás na decisión de eliminar os 13 postos.

Mañá mesmo continuarán coas mobilizacións, aínda que nesta ocasión trasladaranse a Santiago, onde teñen previsto realizar unha concentración de protesta fronte á dirección territorial de Correos, na rúa de Franco, dende as 10.00 até as 12.00 horas. O conflito laboral está a provocar a acumulación de milleiros de obxectos sen repartir.

cig.prensa@galizacig.com