A CIG gaña as eleccións sindicais do persoal funcionario da Axencia Tributaria

A CIG-Administración Pública gañou as eleccións sindicais do persoal funcionario da Axencia Estatal Tributaria (AEAT), celebradas en Galiza o xoves 28 de abril. A central conseguiu 11 representantes e incrementou significativamente a súa presenza nas Xuntas de Persoal Funcionario da Coruña e Pontevedra-Vigo, onde conseguiu subir de un/ha a catro o número de delegados/as.

A CIG obtivo 11 representantes nas Xuntas de Persoal das catro provincias, converténdose así en primeira forza sindical entre os funcionarios e funcionarias, deste subsector do Estado.

Especialmente destacábeis son os resultados obtidos nas provincias da Coruña e Pontevedra, onde a central nacionalista pasou de un representante a catro. Do mesmo xeito, en Ourense subiuse de un delegado a dous, mentres que en Lugo os resultados foron similares aos conseguidos hai catro anos.

En total, estaban chamados a participar no proceso uns 1.000 funcionarios e funcionarias.

Dende a CIG-Administración agradeceuse a confianza depositada nas candidaturas da central e o apoio ao modelo de acción sindical defendido pola Confederación Intersindical Galega.

CANDIDATURAS	DELEGADOS ELECTOS				TOTAIS
	CO	LU	OU	PON
CIG	4	1	2	4	11
SIAT-USO	4	1	1	4	10
GESTHA	2	2	1	3	8
CSI-F	2	2	2	2	8
CCOO	2	1	2	1	6
UGT	2	1	1	2	6
FEDECA	1	0	0	1	2
AXENTES	0	1	0	0	1
Totais Electos	17	9	9	17	52