O Comité de Empresa de TRALUSA denuncia o caos que padece o transporte público en Compostela

Padece cambios de liñas, de horarios, de percorridos e retencións por mor das obras que afectan a toda a cidade e co número de usuarios multiplicado polo Xacobeo

O Comité de Empresa de TRALUSA vén de denunciar a caótica situación na que se atopa o transporte público en Compostela. Caos do que os traballadores desta contrata din non ter responsabilidade algunha afirmando que son “unhas vítimas máis”, por mor da falta de previsión na contratación de persoal de reforzo para garantir un servizo público de calidade.

O Comité de Empresa explica que todo o cúmulo de atrasos, variacións de liñas e demais veñen provocados polo importante número de obras que se están acometendo nas rúas de Compostela e pola improvisación con que se está a actuar desde TUSSA.

Esta empresa municipal de transporte á hora de establecer os horarios e frecuencias do servizo de autobuses non tivo en conta nin os cambios de percorrido, nin o incremento do trafico, nin os continuos atascos que padece a cidade.”Manteñen as mesmas frecuencias e o mesmo número de autobuses para liñas que, por mor dos desvíos, están a ver multiplicados tanto os seus percorridos como as retencións que se provocan”, afirman.

A isto engaden que por mor da celebración do ano Xacobeo o número de usuarios multiplicouse. Porén, “nin TUSSA, nin TRALUSA, tiveron en conta a necesidade de reforzar os servizos coa conseguinte contratación de mais persoal a efectos de poder garantir un servizo de transporte público de calidade”, aseguran.

Por iso recalcan que os e as traballadores/as de Tralusa, lonxe de ser responsábeis desta situación “estamos a padecela día a día, á vez que observamos como as nosas propostas para mellorar a situación caen en saco roto”.