As ex-traballadoras/es de Caramelo manifestan o seu rexeitamento ao proceso “orquestrado” por Jove e a Xunta

Os 237 traballadores e traballadoras de Caramelo despedidos/as por mor do ERE aprobado pola Xunta de Galiza o pasado mes de agosto, remitiron un comunicado de prensa manifestando a súa opinión a respecto de todo o proceso levado a cabo pola dirección da empresa, así como sobre as decisións tomadas tanto pola administración como por CCOO, que se desmarcaron da vontade expresada pola maioría do persoal para permitir unha regulación que emprego que consideran “unha fraude”.

O escrito, que comeza cun agradecemento a todos os cidadáns e cidadás que amosaron o seu apoio ao colectivo de traballadores/as, lembra que a maior parte das/os despedidas/os formaban parte da cadea de produción “a aposta máis rendíbel da empresa e a man de obra máis barata”. Así mesmo, sinalan que esta sección, tal e como se recoñece no informe da Inspección de Traballo desfavorábel ao ERE, era a única que non presentaba fallos na organización e que non resultou un factor desencadenante da crise de Caramelo nin da súa mala situación.

Pola contra, o informe refírese á mala xestión empresarial e á toma de decisións equivocadas de xeito continuado, sen que se teña demostrado que a extinción de 237 empregos na cadea de produción vaia garantir a viabilidade da planta. “O seu labor (polos cadros directivos), como recoñece a Inspección resultou ser penosa, excepto para o peto de Manuel Jove, que non dubidou en recompensar esta xestión con soldos entre 3.000 e  9.000 euros e, nalgúns casos, até 15.000 euros”.

Axudas da Consellaría de Traballo e Economía

Dende o colectivo de ex-traballadoras/es de Caramelo afirman que “Jove e Xunta copropietarios de Caramelo, despiden con cartos de todos os galegos e galegas”. Neste senso, queren lembrar que nove meses antes de presentarse o ERE, as Consellarías de Economía e Traballo concederon axudas públicas por valor de máis de 4.000 millóns das antigas pesetas, sen exixir á dirección da empresa un plano de negocio e sen garantías para as axudas públicas, tal e como ten acontecido coa aprobación do expediente de regulación.

Por esta razón, as e os afectados polo ERE de Caramelo manifestaron as súas dúbidas a respecto do papel da Xunta como garante do emprego, que considerou non vinculante o informe da Inspección, pero si dunha acta de votación “ a todas luces ilegal, contravindo así as máis elementais normas de convivencia en democracia”.

Asemblea ilegal

No comunicado hai un apartado referido aos últimos procedementos, previos á aprobación definitiva da regulación de emprego, que cualifican como “terrorismo patronal”. As/os traballadoras/es defenden a validez da votación do pasado 23 de xullo, na que se rexeitaba “publica e democraticamente por maioría”, a oferta achegada pola empresa ao non cumprir as reivindicacións do persoal.

“Tras a mesma”, sinalan, “nun complot sen precedentes no ámbito laboral galego, a empresa promoveu unha nova votación, auspiciada por CCOO, sindicato minoritario, co beneplácito de Beatriz Mato e orquestrada por un grupo de traballadores “esgotados”. Traballadores/as, explican no escrito, que dende o inicio do conflito permaneceron á marxe, sen involucrarse nin participar nas asembleas, xa que o ERE non lles afectaba. 

Non escatiman críticas tampouco este colectivo de traballadores/as á hora de denunciar os efectos que para CCOO a decisión de non respectar a decisión da asemblea e de apoiar un acordo que restrinxe os dereitos dos empregados/as de Caramelo que quedan aínda na factoría.

Finalmente, as traballadoras e traballadores recordan que agora serán os tribunais os que resolverán se estas actuacións teñen obrado conforme a dereito, así como a responsabilidade penal que proceda en cada caso.