Concentración de delegados e delegadas contra a privatización do novo hospital da área de Vigo

Delegados e delegadas da CIG-Saúde concentráronse ás portas da Xerencia de Atención Primaria de Vigo para manifestar o rexeitamento á posíbel privatización do novo hospital da cidade. A protesta coincidía coa presentación do novo xerente, á que tamén acudiu á conselleira de Sanidade

O xoves 2 de xullo tivo lugar na Xerencia de Atención Primaria de Vigo a presentación do novo Xerente, Francisco Javier Caramés Casal, médico procedente do C.S. de Marín. A dita presentación acudiu a Conselleira de Sanidade e a Xerente do Servizo Galego de Saúde.

Na entrada da Xerencia un grupo de delegados sindicais de CIG-Saúde agardaban á conselleira para manifestarlle o rexeitamento da posíbel privatización do novo hospital de Vigo. “En CIG-Saúde entendemos que logo das distintas mensaxes emitidas por responsables do Servizo Galego de Saúde, entendemos que algo se está cocendo para darlle parte do "negocio" á iniciativa privada.

Na presentación en días pasados do Xerente do CHUVI cos sindicatos e ante a pregunta sobre a redefinición do proxecto do novo hospital feita por CIG-Saúde, o Xerente do CHUVI dixo que primeiro había que ver os recursos sanitarios dos que dispón Vigo e logo habería que definir o proxecto. “Iso quere dicir que ao novo hospital se lle vai privar de servizos e vanse conceder e repartir a centros concertados? Quere dicir que o novo hospital vai ser un parche máis na Área de Vigo?”, pregúntanse dende a Federación de Saúde da CIG.

Dende a central reclámase á Consellaría e ao SERGAS que aclaren as súas pretensións a respecto do novo hospital e que doten á esta área da infrestrutura que precisa. “Vigo merece un gran centro sanitario de referencia, dotado de todos os servizos e tecnoloxía punta e ser financiado e xestionado con recursos públicos”, asevera a CIG-Saúde.