A CIG convoca folga en todo o sector do metal o 5 de febreiro polo xuízo aos catro traballadores do sector

O sector do convenio provincial do metal de Pontevedra vivirá unha nova xornada de folga, convocada pola CIG, o vindeiro 5 de febreiro. Os máis de 22.000 traballadores afectados por este convenio provincial están chamados á folga contra a represión sindical, xa que nesa data van volver ser xulgados catro traballadores do Metal, que no 2007 estiveron case quince días en folga para que se cumprira o convenio, despois do aprazamento do xuízo o pasado 6 de novembro, data na que a CIG convocou outra xornada de folga e solidariedade. A Fiscalía solicitaba catro anos de cárcere para estes catro folguistas.

A continuación reproducimos á integra a folla informativa que está a ser difundida nos centros do traballo do metal:

Á folga o dia 5

O día 5 é unha xornada de folga. Nese dia loitamos contra a inxustiza que pretende meter en prisión a catro traballadores do sector.

Estes traballadores non son delincuentes aínda que se lle piden penas de cadea. Son os traballadores do sector, son a nosa xente, forman parte de nós e debemos protexelos. O Xulgado, a Fiscalía, a Xustiza e o Goberno deben ver que todos nós estamos con eles.

Por esta razón o dia 5 é unha xornada normal de folga: que non se crean as institucións que condenando a estes traballadores o sector do metal no próximo convenio vai renunciar a unha suba salarial xusta. Para nós nunca foi fácil, ninguén nos regalou nada, e a pesar da situación socioeconómica actual na que nos atopamos, non dubidaremos en sair á rúa para defender o noso convenio.

Como en calquera folga a primeira hora partimos desde os lugares habituais e logo nos desprazamos ata o lugar da concentración.

A CIG ten convocada folga en todo o sector do metal porque esta é unha loita pola nosa dignidade.