A CIG valora positivamente o inicio de conversas para analizar a posíbel fusión das caixas galegas

Ante o anuncio do inicio de conversas para analizar a posibilidade dunha fusión entre as dúas caixas galegas, a CIG manifesta a súa valoración positiva xa que supón un paso adiante respecto da situación anterior, na que Caixanova mantiña unha posición totalmente contraria a explorar sequera esta posibilidade. Porén, advirte que non deixa de ser un simple anuncio que haberá que ver como se concreta e advirte que estará moi alerta respecto da incidencia que terá no emprego, xa que algúns dos datos que se están a facer públicos a través dos medios de comunicación son realmente alarmantes e van moito máis alá das previsións iniciais que había respecto do número de postos de traballo a amortizar.

A CIG insiste en que estará vixilante sobre as posíbeis repercusións que puidera ter este proceso de fusión sobre o emprego e exixirá a creación dunha mesa integrada pola administración, a representación das caixas e a representación sindical para facer un seguimento sobre as consecuencias da fusión sobre os postos de traballo e as condicións laborais.

A CIG tamén amosa a súa preocupación sobre se o acordo de fusión vai condicionado á modificación da Lei de Caixas recén aprobada polo parlamento de Galiza e reitera que se oporá a calquera cambio que se faga que supoña un retroceso respecto do control público das caixas e da elección democrática dos órganos de direccións das mesmas.